ئاقسۇ ئاخبارات تورى \ ئاقسۇ ۋىلايەتلىك يۇغۇرما تاراتقۇ مەركىزى. قوشماقلىشىپ تۇغقانلىشىش، بىرلەشمە دوستلۇق پائالىيىتى، يېزىلارغا بېرىپ ھەقسىز كېسەل كۆرۈش... يېقىنقى كۈنلەردىن بۇيان، ۋىلايىتىمىزدىكى ھەرقايسى ناھىيە (شەھەر)لەر، ئورۇنلار ئاپتونوم رايوننىڭ مىللەتلەر ئىتتىپاقلىقى ـ تەرەققىياتى تەربىيەسى ئېيىغا بىرلەشتۈرۈپ، خىزمەتنىڭ كىرىشىش نۇقتىسىنى توغرا تېپىپ، مول مەزمۇنلۇق، رەڭدار پائالىيەتلەرنى قانات يايدۇرۇپ، مىللەتلەر ئىتتىپاقلىقى ـ تەرەققىياتى دەرىخىنى باراقسانلاتتى.

5 ـ ئاينىڭ 13 ـ كۈنى، ئاقسۇ شەھىرىنىڭ ئېگەرچى بازىرى سورتلۇق ئۇرۇق يۇقىرىقى چوغتال كەنتى «مىللەتلەر ئىتتىپاقلىشىپ بىر ئائىلە كىشىلىرىدىن بولۇش، ئىناق تەرەققىي قىلىپ قەلبداش بولۇش» بىرلەشمە دوستلۇق پائالىيىتىنى قانات يايدۇردى. پائالىيەت «شادلىق» ناملىق ئۇسسۇل بىلەن باشلاندى، «خەنفۇ كىيىم كۆرگەزمىسى» ناملىق نومۇر تاماشىبىنلارغا بىر مەيدان گۈزەل، كاتتا كىلاسسىك كىيىم ـ كېچەك كۆرگەزمىسى ئاتا قىلىپ، كۆپچىلىككە جۇڭگونىڭ ئەنئەنىۋى كىيىم ـ كېچەكلىرىنىڭ گۈزەللىكىنى ھېس قىلدۇردى. خەنفۇ كىيگەن بەش بالا ئاپىلىرىغا چاي تۇتتى، چاچلىرىنى تاراپ قويدى، ئۇلارغا بەخت تىلەپ، جۇڭخۇا مىللىتىنىڭ چوڭلارغا ۋاپادار بولۇش، ئۇرۇق ـ تۇغقانلارنى ھۆرمەتلەشتەك مۇنەۋۋەر ئەنئەنىۋى گۈزەل ئەخلاقىغا ۋارىسلىق قىلدى ھەم ئۇنى ئەۋج ئالدۇردى.

5 ـ ئاينىڭ 12 ـ كۈنى، ئاقسۇ شەھەرلىك پارتىيە كومىتېتى پارتىيە مەكتىپى، ئاقسۇ شەھەرلىك باش ئىشچىلار ئۇيۇشمىسى كادىر، ئىشچى ـ خىزمەتچىلەرنى قوشماقلاشقان تۇغقانلىرى بىلەن كۆكيار خاتىرە سارىيى، ۋىلايەتلىك مەدەنىيەت مۇزېيى (مۇزېي)، ئاقسۇ پەن ـ تېخنىكا سارىيى قاتارلىق جايلارنى ئېكسكۇرسىيە قىلىپ، كۆكيار روھىنى ئۆگىنىش، تارىخىي مەدەنىيەتنىڭ سېھرىي كۈچىنى ھېس قىلىش، ئەقلىي ئىقتىدارلىق تۇرمۇشنى ھېس قىلىشقا تەشكىللىدى.

5 ـ ئاينىڭ 10 ـ كۈنى، ئونسۇ ناھىيەسىنىڭ توپقان بازىرى يېڭى دەۋر مەدەنىيلىكى ئورنى (پونكىتى) «ئاممىۋى مەدەنىيەتنى گۈللەندۈرۈش، ئىللىق يۇرت ـ ماكان بەرپا قىلىش» ۋە «مەدەنىي بولۇپ ئار ـ نومۇسنى بىلىش، ئەخلاقنى ئۇلۇغلاپ ياخشىلىققا ئىنتىلىش» باش تېمىسىدا «مىللەتلەر ئىتتىپاقلىشىپ بىر ئائىلە كىشىلىرىدىن بولۇش» بويىچە شىنجاڭنى مەدەنىيەت ئارقىلىق ئوزۇقلاندۇرۇش يۈرۈشلۈك پائالىيىتىنى قانات يايدۇردى.

پائالىيەتتە، پىدائىيلار نەق مەيداندا يەلپىگۈچ ئۇسسۇلى، مەيدان ئۇسسۇلى ۋە قىزىل ناخشا ئېيتىش قاتارلىق نومۇرلارنى ئورۇنلاپ، ئاممىنىڭ قىزغىن ئالقىشىغا ئېرىشتى. بۇ بازار ئاھالىسى ئەھەت ئەمەر مۇنداق دېدى: بۇ قېتىمقى پائالىيەت ھەر مىللەت ئاممىنىڭ ھېسسىياتىنى چوڭقۇرلاشتۇرۇپلا قالماي، يەنە بىزنىڭ مەنىۋى مەدەنىيەت تۇرمۇشىمىزنى بېيىتتى.

5 ـ ئاينىڭ 14 ـ كۈنى، باي ناھىيەسىنىڭ باي بازىرى گۈلزارلىق مەھەللىسى تەۋەلىكتىكى 300دىن ئارتۇق پارتىيە ئەزاسى، كادىر، ئاممىنى دۇڭچياۋلى كەچلىك بازىرىدا «جۇڭخۇا مىللىتى بىر ئائىلە كىشىلىرىدىن بولۇش، جۇڭگو ئارزۇسىنى بىر نىيەتتە ئورتاق ئىشقا ئاشۇرۇش» باش تېمىسىدا يۈرۈشلۈك پائالىيەتنى قانات يايدۇرۇشقا تەكلىپ قىلدى.

پائالىيەتتە، بۇ ناھىيەدىكى قىزىل ناخشا ـ ئۇسسۇل ئۆمىكى ئېلىپ كەلگەن «بەختكە چۆمگەن باي»، «جۇڭخۇا مىللىتى بىر ئائىلە كىشىلىرى»، «سىزگە بىر دەستە جىگدە چېچىكى سوۋغا قىلاي» قاتارلىق مىللەتلەر ئالاھىدىلىكىگە ئىگە ناخشا ـ ئۇسسۇللار كەينى ـ كەينىدىن ئورۇنلاندى، ئېسىل نومۇرلار ئارقىلىق مىللەتلەرنىڭ بۈيۈك ئىتتىپاقلىقى كۈيلىنىپ، تاماشىبىنلارغا بىر مەيدان مول مەنىۋى ئوزۇق ئاتا قىلىندى، نەق مەيداندا ئالقىش ساداسى ئۈزۈلمىدى.

مەھەللە پىدائىيلىرى يەنە ئاممىغا تەشۋىقات قوللانمىسى تارقىتىپ، جۇڭخۇا مىللىتى ئورتاق گەۋدىسى ئېڭىنى مۇستەھكەملەشنىڭ مۇھىملىقىنى قىزغىنلىق، سەۋرچانلىق بىلەن تەشۋىق قىلىپ، ھەر مىللەت ئاممىنى مىللەتلەر ئىتتىپاقلىقى ئېڭىنى كۈچەيتىشكە پائال يېتەكلەپ، مىللەتلەر ئىتتىپاقلىقى ـ تەرەققىياتى خىزمىتىدە تېخىمۇ زور ئەمەلىي ئۈنۈمنى قولغا كەلتۈرۈشكە تۈرتكە بولدى.