ئاقسۇ ئاخبارات تورى \ ئاقسۇ ۋىلايەتلىك يۇغۇرما تاراتقۇ مەركىزى. يېقىندا، جۇڭگو قىزىل كىرېست فوندى جەمئىيىتىنىڭ «پەرۋىشكارلار سەپىرى ـــ شىنجاڭ تۇغما يۈرەك كېسىلى بار بالىلارنى تاسقاپ تەكشۈرۈپ قۇتقۇزۇش ـ ياردەم بېرىش ھەرىكىتى» ئاقسۇغا كېلىپ، ۋىلايىتىمىزدىكى نۆل ياشتىن 16 ياشقىچە بولغان بالىلارغا قارىتا تۇغما يۈرەك كېسىلىنى تاسقاپ تەكشۈرۈپ قۇتقۇزۇش ـ ياردەم بېرىش پائالىيىتىنى قانات يايدۇردى، ئوپېراتسىيە قىلىش كۆرسەتكۈچلىرىگە ماس كېلىدىغان ئاغرىقلار ھەقسىز داۋالىنىدۇ.

ئالتە ياشلىق گۈلنار (ئۆزگەرتىلگەن ئىسىم)نىڭ ئۆيى ئاقسۇ شەھىرىنىڭ قاراتال بازىرى دوسقۇل كەنتىدە بولۇپ، 2022 ـ يىلى 7 ـ ئايدا، ئومۇمىي خەلق سالامەتلىك تەكشۈرۈشىگە قاتناشقاندا تۇغما يۈرەك كېسىلى بارلىقى تەكشۈرۈپ چىقىلغان ئىدى.

بۇ يىل، كەنت كومىتېتىنىڭ ياردىمىدە، ئۇ «پەرۋىشكارلار سەپىرى ـــ شىنجاڭ تۇغما يۈرەك كېسىلى بار بالىلارنى تاسقاپ تەكشۈرۈپ قۇتقۇزۇش ـ ياردەم بېرىش ھەرىكىتى»گە قاتنىشىشقا تىزىملاتتى. شۇ كۈنىدىكى تاسقاپ تەكشۈرۈشتە، گۈلنار ئوپېراتسيە قىلىش كۆرسەتكۈچلىرىگە ماس كەلگەچكە، شاڭخەي دېدا دوختۇرخانىسىغا بېرىپ ھەقسىز داۋالىنىدۇ.

ئىگىلىنىشىچە، «پەرۋىشكارلار سەپىرى ـــ شىنجاڭ تۇغما يۈرەك كېسىلى بار بالىلارنى تاسقاپ تەكشۈرۈپ قۇتقۇزۇش ـ ياردەم بېرىش ھەرىكىتى» جۇڭگو قىزىل كىرېست فوندى جەمئىيىتى باش بولۇپ، ۋۇشى مىڭسى يۈرەك قان تومۇر كېسەللىكلىرى دوختۇرخانىسى، شاڭخەي دېدا دوختۇرخانىسى ۋە ئەيموشېڭ ئېلېكتىر ئۈسكۈنىلىرى سېلىنما چەكلىك شىركىتى قاتارلىق مېھىر ـ شەپقەت يەتكۈزگۈچى كارخانىلار بىلەن بىرلىشىپ مەبلەغ توپلاپ ئورتاق تەشكىللەپ قانات يايدۇرغان تۇغما يۈرەك كېسىلى ئاغرىقلىرىنى تاسقاپ تەكشۈرۈپ قۇتقۇزۇش ـ ياردەم بېرىش پائالىيىتى ئىكەن. ھازىرغىچە، ۋىلايەت بويىچە تۇغما يۈرەك كېسىلىگە گىرپتار بولغان 288 ئاغرىق قۇتقۇزۇش ـ داۋالاشقا ئېرىشكەن.

شاڭخەي دېدا دوختۇرخانىسى تاشقى كېسەللىكلەر بۆلۈمىنىڭ مۇدىرى ليۇ جيەنشى مۇنداق دېدى: بۇ قېتىم، بىز ئاساسلىقى بۇرۇن تۇغما يۈرەك كېسىلى بويىچە تەكشۈرۈلمىگەن بالىلارنى تاسقاپ تەكشۈرىمىز ھەم داۋالانغان بالىلارنى قايتا تەكشۈرىمىز. تۇغما يۈرەك كېسىلى ئالاھىدە خاراكتېرلىك بولغاچقا، قىسمەن بالىلارغا قايتا دىياگنوز قويۇلىدۇ، ھەتتا ئىككىنچى قېتىم، ئۈچىنچى قېتىم ئوپېراتسىيە قىلىنىدۇ. ھازىر، بىز ئاقسۇ ۋىلايىتىدە جەمئىي 885 بالىنى تاسقاپ تەكشۈردۇق، 66 بالا ئوپېراتسىيە قىلىش شەرتىگە ماس كەلدى. بىز بۇ بالىلارنى داۋالايمىز ھەم ئوپېراتسىيە قىلىمىز.