ئاقسۇ ئاخبارات تورى \ ئاقسۇ ۋىلايەتلىك يۇغۇرما تاراتقۇ مەركىزى. 5 ـ ئاينىڭ 9 ـ كۈنى، ۋىلايەت 2023 ـ يىللىق مەدەنىي شەھەر بەرپا قىلىش خىزمىتى يىغىنى ئېچىپ، ۋىلايىتىمىزنىڭ 2023 ـ يىللىق مەدەنىي شەھەر بەرپا قىلىش خىزمىتىنى بىرتۇتاش پىلانلاپ ئالغا سىلجىتتى.

يىغىندا مۇنداق تەلەپ قىلىندى: ھەرقايسى ناھىيە (شەھەر)لەر مەدەنىي شەھەر بەرپا قىلىش خىزمىتىدىكى مەسئۇلىيەت تۇيغۇسى، بۇرچ تۇيغۇسى، تەخىرسىزلىك تۇيغۇسىنى ھەقىقىي كۈچەيتىپ، مەدەنىي شەھەر بەرپا قىلىشنى شى جىنپىڭ يېڭى دەۋر جۇڭگوچە سوتسىيالىزم ئىدىيەسىنى ئۆگىنىپ ئىزچىللاشتۇرۇشتىكى نەمۇنىلىك شەھەر، غايە ـ ئېتىقادنى مۇستەھكەملەش، «تۆت ئاڭ»نى مەھكەم تۇرغۇزۇش، باشتىن ـ ئاخىر «تۆت ئىشەنچ»نى چىڭىتىش، «ئىككىنى تىكلەش»نى چوڭقۇر ئىگىلەش، «ئىككىنى قوغداش»نى قەتئىي ئىشقا ئاشۇرۇشتا سەپنىڭ ئالدىدا ماڭغان شەھەرگە ئايلاندۇرۇشى كېرەك. كىشىلەرنىڭ گۈزەل تۇرمۇشقا بولغان ئىنتىلىشىنى ئىشقا ئاشۇرۇشتىن ئىبارەت تۈپكى تەلەپنى بەرپا قىلىش خىزمىتىنىڭ مەۋقەسى ۋە مەقسىتى قىلىپ، ھەر مىللەت ئاممىنىڭ كۈنسايىن ئېشىۋاتقان گۈزەل تۇرمۇش ئېھتىياجىنى تېخىمۇ ياخشى قاندۇرۇشنى كۈرەش نىشانى قىلىشى كېرەك.

ھازىر، مەدەنىي شەھەر بەرپا قىلىش خىزمىتى چوڭقۇرلاشتۇرۇپ كېڭەيتىش، ئۆتكەلگە مەركەزلىك ھۇجۇم قىلىشتىكى ئاچقۇچلۇق مەزگىلگە كىردى، دىققەتنى نىشان يۆنىلىشىگە باشتىن ـ ئاخىر مەركەزلەشتۈرۈپ، خەلقنى ئاساس قىلىش، دائىملىق، ئۇزاق ئۈنۈملۈك بولۇش، ئىنچىكە باشقۇرۇش، تۈرگە ئايرىپ تەدبىر قوللىنىش، ئىشەنچنى ئاشۇرۇش قاتارلىق جەھەتلەردە بەرپا قىلىشنى ياخشى تۇتۇپ، مەدەنىي شەھەر بەرپا قىلىش خىزمىتىنىڭ مول مۇۋەپپەقىيىتى ۋە ئەلا نەتىجىلىرى بىلەن، ئىتتىپاق، ئىناق، مەدەنىي، باي، گۈزەل ئاقسۇنىڭ يېڭى سەھىپىسىنى پۈتۈش كېرەك.

يىغىندا، ئاقسۇ شەھىرى، شايار ناھىيەسى، توقسۇ ناھىيەسى، ئۇچتۇرپان ناھىيەسى، كەلپىن ناھىيەسى يېقىنقى مەزگىللىك مەدەنىي شەھەر بەرپا قىلىش خىزمىتىنى قانات يايدۇرۇش ئەھۋالىدىن دوكلات بەردى.

ۋىلايەتلىك پارتىيە كومىتېتىنىڭ ئەزاسى، تەشۋىقات بۆلۈمىنىڭ باشلىقى، ۋىلايەتلىك مەنىۋى مەدەنىيلىك قۇرۇلۇشىغا يېتەكچىلىك قىلىش كومىتېتىنىڭ مۇئاۋىن مۇدىرى چاڭ يۈشۈەن يىغىنغا قاتناشتى.