شىنجاڭ گېزىتى، ئۈرۈمچى، 5 - ئاينىڭ 7 - كۈنى خەۋىرى　ئانار بۇلۇت\شىنجاڭ گېزىتى مۇخبىرى ۋاڭ يۇڭفېينىڭ شىنجاڭ ئاكسىيە نازارەتچىلىكى ئىدارىسىدىن ئىگىلىشىچە، 1 - پەسىلدە، شىنجاڭ كارخانىلىرى كاپىتال بازىرىدا بىۋاسىتە يۈرۈشتۈرگەن مەبلەغ 11 مىليارد 467 مىليون يۈەن بولۇپ، بۇلتۇرقى ئوخشاش مەزگىلدىكىدىن ％6.56 ئاشقان، 2021 - يىلىنىڭ ئوخشاش مەزگىلىدىكىدىن ％35.22 ئاشقان.

مەبلەغ يۈرۈشتۈرۈش شەكلىدىن قارىغاندا، پېيى بازارغا سېلىنغان شىركەتلەرنىڭ تۇنجى پېيىنى بازارغا سېلىش، پېيىنى نىشانلىق كۆپەيتىپ تارقىتىش، پاي تەقسىملەش ھەم شىركەت زايومى شىنجاڭ كاپىتال بازىرىنىڭ ئاساسلىق مەبلەغ يۈرۈشتۈرۈش شەكلى ھېسابلىنىدۇ.

پېيى بازارغا سېلىنغان شىركەتلەرنىڭ تۇنجى پېيىنى بازارغا سېلىپ مەبلەغ يۈرۈشتۈرۈشى جەھەتتە، باۋدى كانچىلىقى تۇنجى پېيىنى بازارغا سېلىپ 876 مىليون يۈەن مەبلەغ يۈرۈشتۈرۈپ، 2023 - يىلى پېيىنى بازارغا سېلىشتا «تۇنجى ئىشنى غەلىبىلىك باشلاش»نى ئىشقا ئاشۇردى. پېيى بازارغا سېلىنغان شىركەتلەرنىڭ پاي ھوقۇقى ئارقىلىق مەبلەغ يۈرۈشتۈرۈشى جەھەتتە، چىڭسۇڭ بىناكارلىق خىمىيە سانائىتى، لىئاڭ تېخنىكىسىدىن ئىبارەت پېيى بازارغا سېلىنغان ئىككى شىركەتنىڭ ئاشكارا تارقىتىلمىغان مەبلەغ يۈرۈشتۈرۈش سوممىسى جەمئىي 1 مىليارد 627 مىليون يۈەن بولدى.

شىنجاڭنىڭ شىركەت زايومى ۋە مۈلۈك قوللاش تىپىدىكى ئاكسىيە ئارقىلىق مەبلەغ يۈرۈشتۈرۈش سۈرئىتى تېز بولدى، مەبلەغ يۈرۈشتۈرۈش ئۇسۇلىدا كۆپ مەنبەلىك يېڭىلىق يارىتىش يۈزلىنىشى بارلىققا كەلدى. شىنجاڭ كارخانىلىرى شىركەت زايومى ۋە مۈلۈك قوللاش تىپىدىكى ئاكسىيە تارقىتىش ئارقىلىق جەمئىي 8 مىليارد 435 مىليون يۈەن مەبلەغ يۈرۈشتۈردى، بۇ، 2022 - يىلىنىڭ ئوخشاش مەزگىلىدىكىدىن ％49.29 ئاشتى. بۇنىڭ ئىچىدە توققۇز شىركەت تارقاتقان شىركەت زايومى 6 مىليارد 535 مىليون يۈەن بولۇپ، 2022 - يىلىنىڭ ئوخشاش مەزگىلىدىكىدىن ％15.66 ئاشتى. بۇنىڭ ئىچىدە ئىككى شىركەت يېزا - كەنتلەرنى گۈللەندۈرۈش زايومىنىڭ ئىجادىي تۈرىنى تارقىتىپ، ئاساسلىقى يېزا - كەنتلەرنى گۈللەندۈرۈشكە ئالاقىدار ساھەلەردىكى تۈر قۇرۇلۇشىغا ئىشلەتتى؛ بىر شىركەت مۈلۈك قوللاش تىپىدىكى ئاكسىيە تارقىتىش ئارقىلىق 1 مىليارد 900 مىليون يۈەن مەبلەغ يۈرۈشتۈردى، ئۇنىڭ ئاساسىي مۈلكى ئۇل ئەسلىھە ھەققى بولۇپ، شىركەتنىڭ ساقلانما مەبلىغى، تۆۋەن قاتلام مۈلكىنى ئۈنۈملۈك جانلاندۇرۇپ، كارخانىنىڭ نەق پۇل ئوبوروتىنى ئەلالاشتۇردى.

مەبلەغ يۈرۈشتۈرۈش قۇرۇلمىسىدىن قارىغاندا، پاي ھوقۇقى تۈرىدىكى يۈرۈشتۈرۈلگەن مەبلەغ 3 مىليارد 32 مىليون يۈەن بولۇپ، 1 - پەسىلدە كاپىتال بازىرىدا يۈرۈشتۈرۈلگەن مەبلەغنىڭ ％26.44ىنى ئىگىلىدى؛ ھەقدارلىق تۈرىدىكى يۈرۈشتۈرۈلگەن مەبلەغ 8 مىليارد 435 مىليون يۈەن بولۇپ، 1 - پەسىلدە كاپىتال بازىرىدا يۈرۈشتۈرۈلگەن مەبلەغنىڭ ％73.56ىنى ئىگىلىدى.

پېيى بازارغا سېلىنغان شىركەتلەر ئاشكارىلىغان تۇنجى قايتا مەبلەغ يۈرۈشتۈرۈش پىلانىدىكى توپلانغان مەبلەغنىڭ سېلىنما يۆنىلىشىدىن قارىغاندا، كۆچمە مەبلەغنى تولۇقلاش ۋە بانكا قەرزىنى قايتۇرۇشقا ئىشلىتىش پىلانلانغان مەبلەغ 1 مىليارد 78 مىليون يۈەن بولۇپ، ％45.12نى ئىگىلىدى؛ تۈر قۇرۇلۇشىغا ئىشلىتىش پىلانلانغان توپلانغان مەبلەغ 1 مىليارد 311 مىليون يۈەن بولۇپ، ％54.88نى ئىگىلىدى.

تىلغا ئېلىشقا ئەرزىيدىغىنى شۇكى، يېڭى ئۈچ بۆلەك ۋە رايون خاراكتېرلىك پاي ھوقۇقى بازىرىدا ۋىۋىسكا ئاسقان ۋە كۆرگەزمە قىلىدىغان كارخانىلار ۋەكىللىكىدىكى ئوتتۇرا، كىچىك، ئۇششاق كارخانىلارنىڭ مەبلەغ يۈرۈشتۈرۈشىدە ئېشىش كۆرۈلدى. 1 - پەسىلدە يېڭى ئۈچ بۆلەك ۋە شىنجاڭ پاي ھوقۇقى سودا مەركىزىدە ۋىۋىسكا ئاسقان كارخانىلارنىڭ يۈرۈشتۈرگەن مەبلىغى جەمئىي 529 مىليون يۈەن بولۇپ، 2022 - يىلىنىڭ ئوخشاش مەزگىلىدىكىدىن ％74.01 ئېشىپ، ئوتتۇرا، كىچىك، ئۇششاق كارخانىلارنىڭ تەرەققىياتىنى كۈچلۈك قوللىدى.