ئاقسۇ ئاخبارات تورى \ ئاقسۇ ۋىلايەتلىك يۇغۇرما تاراتقۇ مەركىزى. 4 ـ ئاينىڭ 28 ـ كۈنى، ئاقسۇ سودىگەر چاقىرىش مۇلازىمەت مەركىزىنىڭ 2023 ـ يىلى 4 ـ قېتىملىق مەركەزلىك كېلىشىم ئىمزالاش مۇراسىمى ئۆتكۈزۈلۈپ، نېفىت ـ تەبىئىي گاز ئىشلەپچىقىرىش، پىششىقلاش، يېشىل كانچىلىق، ئىستراتېگىيەلىك يېڭىدىن گۈللەنگەن كەسىپلەر، توقۇمىچىلىق، كىيىم ـ كېچەك قاتارلىق ساھەلەرگە چېتىلىدىغان 15 تۈردە كېلىشىم ئىمزالىنىپ، كېلىشىم سوممىسى 17 مىليارد 672 مىليون يۈەنگە يەتتى. ۋىلايەتلىك پارتىيە كومىتېتىنىڭ شۇجىسى ۋۇ خۇڭجەن كېلىشىم ئىمزالاشقا گۇۋاھچى بولدى.

  شۇ كۈنى يەنە ۋىلايىتىمىزنىڭ سودىگەر چاقىرىپ مەبلەغ جەلپ قىلىشتا مەبلەغ ئەمەلىيلەشتۈرۈش ئەھۋالى، ئالدىنقى ئۈچ قېتىملىق مەركەزلىك كېلىشىم ئىمزالانغان تۈرلەر ۋە 7 ـ نۆۋەتلىك ئاسىيا يەرمەنكىسىدە كېلىشىم ئىمزالانغان تۈرلەردە كېلىشىمنى ئادا قىلىش ئەھۋالى ئومۇمىي ئۇقتۇرۇش قىلىندى، ناھىيە (شەھەر)لەرنىڭ تۈر قۇرۇلۇشى جەريانىدىكى قىيىن نۇقتا، توسۇق نۇقتىلارنى چوڭقۇر تەھلىل قىلىپ، تۈرلەرنى نەق مەيداندا تەكشۈرۈپ تەتقىق قىلىش سالمىقىنى زورايتىپ، چارە ـ تەدبىرلەرنى پىلانلاپ، كارخانىلارنىڭ تۈر قۇرۇلۇشىنىڭ ھەرقايسى باسقۇچلىرىدىكى قىيىن مەسىلىلىرىنى ماسلاشتۇرۇپ ھەل قىلىشىغا ۋاقتىدا ياردەم بېرىشىگە ھەيدەكچىلىك قىلىنىپ، بېكىتىلگەن ۋاقىت جەدۋىلى، يول خەرىتىسى، ۋەزىپىنامىگە ئاساسەن، پۈتۈن دەۋرىيلىك مۇلازىمەت، پۈتۈن جەريانلىق ئالغا سىلجىتىش كۈچەيتىلىپ، تۈرلەرنىڭ بالدۇرراق ئىشلەپچىقىرىشقا كىرىشتۈرۈلۈپ ئۈنۈم ھاسىل قىلىشىغا ھەقىقىي كاپالەتلىك قىلىندى.

  بۇ يىل ۋىلايەت «سەككىز چوڭ كەسىپ توپى»نى يېتىلدۈرۈپ ۋە زورايتىپ، سودىگەر چاقىرىپ مەبلەغ جەلپ قىلىشتىن ئىبارەت «1 ـ نومۇرلۇق قۇرۇلۇش»نى زور كۈچ بىلەن يولغا قويۇپ، سودىگەر چاقىرىپ مەبلەغ جەلپ قىلىش بويىچە جەمئىي 63 تۈردە كېلىشىم ئىمزالىدى، ئىمزالانغان كېلىشىم سوممىسى 163 مىليارد 445 مىليون يۈەنگە يەتتى، بۇنىڭ ئىچىدە ئالدىنقى ئۈچ قېتىملىق مەركەزلىك كېلىشىم ئىمزالانغان تۈرلەردە تەرتىپلىك ئىش باشلىنىپ، باسقۇچلۇق نەتىجە قولغا كەلتۈرۈلدى. بۇ قېتىمقى كېلىشىم ئىمزالاش ۋىلايىتىمىزنىڭ قەلب ۋە كۈچنى مۇجەسسەملەپ، سودىگەر چاقىرىشنى چىڭ تۇتۇش، بىر نىيەت ـ بىر مەقسەتتە ھەمكارلىشىپ تەرەققىياتنى كۆزلەش ئىشەنچى ۋە ئىرادىسىنى يەنىمۇ نامايان قىلىپ، كەسىپلەرنىڭ تىپىنى ئۆزگەرتىپ، دەرىجىسىنى ئۆستۈرۈشكە ياردەم بېرىپ، پۈتۈن يىللىق سودىگەر چاقىرىپ مەبلەغ جەلپ قىلىش خىزمىتىنىڭ يەنە يېڭى پەللىگە كۆتۈرۈلۈشىگە تۈرتكە بولۇشقا ياخشى ئاساس سالدى.

  ۋىلايەت رەھبەرلىرىدىن ئادىل ئەلى، لياڭ فېڭيۈەن، جيا جىڭلېي ۋە ھەرقايسى ناھىيە (شەھەر)لەر، ۋىلايەتكە بىۋاسىتە قاراشلىق ئالاقىدار ئورۇنلارنىڭ ئاساسلىق رەھبەرلىرى كېلىشىم ئىمزالاشقا گۇۋاھچى بولدى.