شىنجاڭ گېزىتى، تيەنجىن، 4 - ئاينىڭ 26 - كۈنى خەۋىرى ئانار بۇلۇت\شىنجاڭ گېزىتى مۇخبىرى ياۋ گاڭ خەۋەر قىلىدۇ: 4 - ئاينىڭ 25 - كۈنى، «يۈز ياپقۇڭنى قايرىۋەت − شىنجاڭ ياخشى جاي» پۈتۈن مەملىكەتتە سەييارە ئويۇن قويۇش بويىچە مۇتەخەسسىسلەر مۇھاكىمە يىغىنى (تيەنجىن بېكىتى) پائالىيىتى ئۆتكۈزۈلدى. تيەنجىن مۇزىكا شۆيۈەنى، تيەنجىن ئۇسسۇلچىلار جەمئىيىتى، تيەنجىن ياشلار دوستلۇق ئەلچىسى سەنئەت ئۆمىكىدىكى كۆپلىگەن كەسپىي زاتلار ھەم ئالاقىدار مۇتەخەسسىسلەر بۇ تىياتىرغا قارىتا يۇقىرى قاتلاملىق، كۆپ نۇقتىلىق ئىدىيە ئۇچرىشىشى ۋە مۇھاكىمە - تەھلىل ئېلىپ بېرىپ، يېڭى دەۋردىكى شىنجاڭنىڭ ئىتتىپاقلىقى، ئىناقلىقى، تەرەققىياتىنى ئەكس ئەتتۈرىدىغان تېخىمۇ كۆپ نادىر ئەسەرلەرنى يارىتىشقا كۈچ قوشتى.

يىغىنغا قاتناشقانلار ئويۇنغا يۇقىرى باھا بېرىپ، «يۈز ياپقۇڭنى قايرىۋەت − شىنجاڭ ياخشى جاي» ھەم تۇرمۇشتىن كەلگەن، ھەم دەۋر قىياپىتىنى نامايان قىلغان، ئىدىيەۋى چوڭقۇرلۇققا ۋە روشەن يەرلىك ئۇسلۇبقا ئىگە بولغان كېچىلىك بوپتۇ، دەپ قارىدى.

«تيەنجىندە يۇرتۇمنىڭ نومۇرلىرىنى كۆرۈپ، ناھايىتى تەسىرلەندىم، شۇنداقلا ئىنتايىن ھاياجانلاندىم.» تيەنجىن مۇزىكا شۆيۈەنىنىڭ مۇئاۋىن باشلىقى ۋاڭ خۇڭۋېي مۇنداق دېدى: بۇ بەدىئىيلىكى يۇقىرى، مەزمۇنى روشەن تىياتىر نومۇرى ئىكەن. پۈتكۈل كېچىلىكنىڭ باش تېمىسى گەۋدىلىك بولۇپ، ھەم جۇڭخۇا مۇنەۋۋەر ئەنئەنىۋى مەدەنىيىتى ئەۋج ئالدۇرۇلۇپتۇ، ھەم ھەر مىللەت ئاكا - ئۇكا، ئاچا - سىڭىللارنىڭ يېڭى دەۋر، يېڭى مۇساپىدىكى يېڭى قىياپىتى، يېڭى كەيپىياتى نامايان قىلىنىپ، شىنجاڭنىڭ يېڭى دەۋر سەنئىتىدە قولغا كەلتۈرگەن يېڭى نەتىجىلىرى گەۋدىلەندۈرۈلۈپتۇ. شىنجاڭنىڭ مۇشۇنداق ئويۇنلارنى كۆپرەك قويۇشىنى، تېخىمۇ كۆپ كىشىنىڭ مەدەنىيەت ۋە سەنئەت ئارقىلىق شىنجاڭنى تونۇشى، شىنجاڭنى چۈشىنىشىنى ئۈمىد قىلىمەن.

«قۇياش نۇرىغا چۆمگەن مەكىت» ناملىق ئۇسسۇل تيەنجىن ياشلار دوستلۇق ئەلچىسى سەنئەت ئۆمىكىنىڭ مۇئاۋىن ئۆمەك باشلىقى چېڭ يۆدە چوڭقۇر تەسىرات قالدۇردى، «ئويۇندا، كۆرۈرمەنلەر داپ رىتىمىغا جور بولۇشتى، بۇ خۇددى ئۇسسۇلنى تەڭ ئوينىغاندەك تەسىر بېرىپ، كىشىگە شادلىق تۇيغۇسى بېغىشلىدى، مەن بۇنىڭدىن شىنجاڭدىكى ھەر مىللەت خەلقنىڭ تۇرمۇشىدا بارلىققا كەلگەن كۈنسېرى يېڭىلىنىۋاتقان ئۆزگىرىشلەرنى، ئۇلارنىڭ تۇرمۇشىنىڭ خۇشال - خۇرام، بەختلىك ئىكەنلىكىنى ھېس قىلدىم».

تيەنجىن ئۇسسۇلچىلار جەمئىيىتىنىڭ مۇئاۋىن رەئىسى شى خۇي ئويۇن ئارقىلىق شىنجاڭدىن كەلگەن قىزغىن ھېسسىياتنى ھېس قىلدى، «كېچىلىكتە ئەنئەنىۋىلىك بىلەن زامانىۋىلىق مۇكەممەل يۇغۇرۇلغان بولۇپ، دۇنياغا جۇڭگو شىنجاڭ ھېكايىسىنى سۆزلەشتىكى ناھايىتى ياخشى ۋاسىتە بوپتۇ. شىنجاڭدىكى ئەدەبىيات - سەنئەت خىزمەتچىلىرى توغرا يولدا چىڭ تۇرۇپ يېڭىلىق يارىتىپ، كۆرۈرمەنلەرگە مودا، زامانىۋى شىنجاڭ ئوبرازىنى نامايان قىپتۇ».

4 - ئاينىڭ 19 - كۈنىدىن 25 - كۈنىگىچە، مۇزىكا، ئۇسسۇل، شېئىر، سۈرەت شەكلىدىكى چوڭ تىپلىق تىياتىر «يۈز ياپقۇڭنى قايرىۋەت − شىنجاڭ ياخشى جاي» پۈتۈن مەملىكەتتە سەييارە ئويۇن قويۇش بويىچە بېيجىڭ، تيەنجىندە ئورۇنلاندى، ھەربىر مەيدان ئويۇندا زال كۆرۈرمەنلەر بىلەن لىق تولۇپ، كۆرۈرمەنلەرنىڭ ياخشى باھاسى ئۈزۈلمىدى. كېيىنكى قەدەمدە، بۇ تىياتىر يەنە خاڭجوۋ، گۇاڭجوۋ ۋە شېنجېندا ئورۇنلىنىدۇ.