4-ئاينىڭ 24-كۈنى چۈشتىن كېيىن، تارباغاتاي ۋىلايەتلىك مەمۇرىي مەھكىمە ئاخبارات ئىشخانىسى ئاۋىياتسىيە كەسپىنى يېتىلدۈرۈش، تەرەققىي قىلدۇرۇش ئەھۋالى توغرىسىدا ئاخبارات ئېلان قىلىش يىغىنى ئاچتى.

جاڭ ياڭ فوتوسى

    ئانار بۇلۇت\شىنجاڭ گېزىتى خەۋىرى(مۇخبىر رايىدە، ئىختىيارىي مۇخبىر جاڭ ياڭ خەۋىرى) تارباغاتاي ئاۋىياتسىيە تىرانسپورت تورىنى تېخىمۇ ياخشى مۇكەممەللەشتۈرۈش ئۈچۈن، بۇ يىل ياز ۋە كۈز پەسلىدە، تارباغاتاي ۋىلايىتى چۆچەك−ئۈرۈمچى ئاۋىياتسىيە لىنىيەسىدە ھەر كۈنى ئۈچ نۆۋەتچى ئايروپىلان كۆپەيتىدۇ، چۆچەك−شىخەنزە−شېنياڭ ئاۋىياتسىيە لىنىيەسىدە ھەر ھەپتىدە بىر قېتىم قاتنايدىغان نۆۋەتچى ئايروپىلان كۆپەيتىلىپ ھەر سەيشەنبە، شەنبە كۈنى بىر قېتىم نۆۋەتچى ئايروپىلان قاتنايدۇ؛ غۇلجا−چۆچەك−ئالتاي ئاۋىياتسىيە لىنىيەسى، چۆچەك−شىخەنزە−ئاقسۇ ئاۋىياتسىيە لىنىيەسى ئەسلىگە كەلتۈرۈلىدۇ.

    شىنجاڭ تارباغاتاي نۇقتىلىق ئېچىش، ئېچىۋېتىش سىناق رايونى قۇرۇلۇشىنىڭ ئۈزلۈكسىز ئالغا سىلجىتىلىشىغا ئەگىشىپ، تارباغاتاي ۋىلايىتىنىڭ ئىقتىسادى يېڭى پۇرسەت ۋە تەرەققىياتنى كۈتۈۋالدى، سودا ئالاقىسى قىلىدىغان، سەپەرگە چىقىدىغان ئاممىنىڭ سانى ئۈزلۈكسىز ئاشتى، 1-پەسىلدە چۆچەك ئايرودۇرۇمىنىڭ يولۇچى توشۇش مىقدارى 26 مىڭ 100 ئادەم قېتىمغا يېتىپ، بۇلتۇرقى ئوخشاش مەزگىلدىكىدىن %9 ئاشتى.

    ئىگىلىنىشىچە، 4-ئاينىڭ 25-كۈنى يەنە چۆچەك−چېڭدۇ ئاۋىياتسىيە لىنىيەسى ئېچىلىپ، ھەر سەيشەنبە، پەيشەنبە، شەنبە كۈنلىرى بىر قېتىمدىن نۆۋەتچى ئايروپىلان قاتنايدىكەن؛ 5-ئايدا يېڭىدىن چۆچەك− لەنجوۋ−جېڭجوۋ ئاۋىياتسىيە لىنىيەسى ئېچىلىپ، ھەر سەيشەنبە، پەيشەنبە، شەنبە كۈنلىرى بىر قېتىمدىن نۆۋەتچى ئايروپىلان قاتنايدىكەن، شۇ ۋاقىتتا چۆچەك ئايرودۇرۇمىدىن شىنجاڭ ئىچى-سىرتىدىكى 11 ئايرودۇرۇمنىڭ ھەممىسىگە ئايروپىلان قاتناش ئىشقا ئاشۇرۇلىدىكەن.

    «ئاۋىئاتسىيە كەسپى مۇھىم ئىستراتېگىيەلىك يېڭىدىن گۈللەنگەن كەسىپ. تارباغاتاي ۋىلايىتىنىڭ ئاۋىياتسىيە كەسپىنىڭ تەرەققىياتىنى ئالغا سىلجىتىش ئۈچۈن، بىز بىر قاتار تەدبىرلەرنى قوللاندۇق. نۆۋەتتە، ئىشلىتىلىۋاتقان چۆچەك ئايرودۇرۇمىدىن باشقا، يەنە دۆلەتنىڭ يىرىك پىلانىغا كىرگۈزۈلگەن شىخو ئايرودۇرۇمى، قوبۇقسار ئايرودۇرۇمى تۈرىنى ماس قەدەمدە ئالغا سىلجىتىپ، ئىككى ئايرودۇرۇم تۈرىنىڭ ئالدىنقى باسقۇچلۇق رەسمىيەتلىرىنى تېز بېجىرىپ، چۆچەك ئايرودۇرۇمىنىڭ مۇقىم يۈرۈشۈشىگە كاپالەتلىك قىلىش ئاساسىدا، شىخو ئايرودۇرۇمى، قوبۇقسار ئايرودۇرۇمىنىڭ ئۆز قەرەلىدە ئىش باشلىشىغا ھەقىقىي كاپالەتلىك قىلىمىز» دېدى 4-ئاينىڭ 24-كۈنى تارباغاتاي ۋىلايەتلىك تەرەققىيات ۋە ئىسلاھات كومىتېتىنىڭ مۇدىرى ليۇ چۇڭ.

    ھازىر، چۆچەك ئايرودۇرۇمىدىن غۇلجا، ئالتاي، شىخەنزە، قومۇل، ئۈرۈمچىدىن ئىبارەت شىنجاڭ ئىچىدىكى بەش ئايرودۇرۇمغا، شېنياڭ، شىئەن، چېڭدۇدىن ئىبارەت دۆلەت ئىچىدىكى ئۈچ ئايرودۇرۇمغا بىۋاسىتە ئايروپىلان قاتنىدى.

«ئانار بۇلۇت»تىن ئېلىپ تەرجىمە قىلىندى