شىنخۇا ئاگېنتلىقى، شىئەن، 5 - ئاينىڭ 18 - كۈنى تېلېگراممىسى (مۇخبىرلار جۇ چاۋ، جاڭ جىڭپىن) 5 - ئاينىڭ 18 - كۈنى چۈشتىن بۇرۇن، دۆلەت رەئىسى شى جىنپىڭ شىئەندە جۇڭگوغا جۇڭگو − ئوتتۇرا ئاسىيا باشلىقلار يىغىنىغا قاتنىشىش ھەم دۆلەت ئىشلىرى زىيارىتىدە بولۇش ئۈچۈن كەلگەن قىرغىزىستان زۇڭتۇڭى جاپاروف بىلەن سۆھبەتلەشتى. ئىككى دۆلەت باشلىقلىرى جۇڭگو - قىرغىزىستان مۇناسىۋىتىنى يېڭى دەۋردىكى ئومۇميۈزلۈك ئىستراتېگىيەلىك ھەمراھلىق مۇناسىۋىتىگە ئۆستۈرۈشنى جاكارلىدى.

شى جىنپىڭ مۇنداق كۆرسەتتى: بۇلتۇر بىز ئىككى قېتىم كۆرۈشتۇق، جۇڭگو - قىزغىزىستان مۇناسىۋىتى ۋە ئىككى دۆلەتنىڭ ھەرقايسى ساھەلەردىكى ھەمكارلىقى توغرىسىدا ھاسىل قىلغان مۇھىم ئورتاق تونۇش ئۈنۈملۈك ئەمەلىيلىشىپ، ئىككى دۆلەت مۇناسىۋىتىنىڭ تەرەققىياتىغا كۈچلۈك ھەرىكەتلەندۈرگۈچى كۈچ قوشتى. جۇڭگو - قىرغىزىستان مۇناسىۋىتى 31 يىللىق تەرەققىيات مۇساپىسىنى بېسىپ ئۆتتى، جۇڭگو تەرەپ قىرغىزىستان تەرەپ بىلەن ئىناق قوشنا بولۇپ دوستانە ئۆتىدىغان، گۈللىنىشتىن ئورتاق بەھرىلىنىدىغان جۇڭگو - قىرغىزىستان تەقدىر ئورتاق گەۋدىسى بەرپا قىلىپ، ئىككى دۆلەتنىڭ تەرەققىياتى، گۈللىنىشىگە كۈچ قوشۇشنى خالايدۇ.

شى جىنپىڭ مۇنداق تەكىتلىدى: جۇڭگو بىلەن قىرغىزىستان ئۆزئارا قوللاشنى كۈچەيتىشى، بولۇپمۇ، بىر - بىرىنىڭ يادرولۇق مەنپەئىتىنى ئېنىق ۋە كۈچلۈك قوللىشى، ئۆزئارا ئىشىنىدىغان، ئۆزئارا قەدىرلەيدىغان ياخشى دوستلاردىن بولۇشى كېرەك. تەرەققىيات ئىستراتېگىيەسىنى ئۇدۇللاشتۇرۇش ۋە سىياسەتنى ماسلاشتۇرۇشنى كۈچەيتىپ، «بىر بەلباغ، بىر يول»نى يۇقىرى سۈپەتتە ئورتاق قۇرۇش ئارقىلىق ھەرقايسى ساھەلەردىكى ئەمەلىي ھەمكارلىقنى ئالغا سىلجىتىپ، ئىقتىساد - سودا ھەمكارلىقى سەۋىيەسىنى ئۆستۈرۈپ، خەلق تۇرمۇشى تۈر قۇرۇلۇشى ۋە نامراتلارنى يۆلەش، نامراتلارنى ئازايتىش، يېزا - كەنتلەرنى گۈللەندۈرۈش قاتارلىق ساھەلەردىكى ھەمكارلىقنى ئالغا سىلجىتىپ، ئۆزئارا تۇتاشتۇرۇش، ئۆزئارا راۋانلاشتۇرۇش ھەمكارلىقىنى چوڭقۇرلاشتۇرۇپ، جۇڭگو - قىرغىزىستان - ئۆزبېكىستان تۆمۈريولى قۇرۇلۇشىنى بالدۇرراق باشلاش كېرەك. جۇڭگو تەرەپ قىرغىزىستاننىڭ ئەلا سۈپەتلىك يېزا ئىگىلىك قوشۇمچە مەھسۇلاتلىرىنى ئىمپورت قىلىشنى كۆپەيتىپ، تېخىمۇ كۆپ جۇڭگو كارخانىلىرىنىڭ قىرغىزىستانغا بېرىپ مەبلەغ سېلىپ كەسىپنى گۈللەندۈرۈشىگە ئىلھام بېرىشنى خالايدۇ. ئىككى تەرەپ يەنە يەرلىكلەر ھەمكارلىقىنى كۈچەيتىپ، ئادىمىيەت جەھەتتىكى ئالماشتۇرۇشنى كېڭەيتىپ، ئىككى دۆلەت مۇناسىۋىتى تەرەققىياتىنىڭ جەمئىيەت ۋە خەلق رايى ئاساسىنى مۇستەھكەملىشى كېرەك. خەۋپسىزلىك ھەمكارلىقىنى چوڭقۇرلاشتۇرۇپ، «بىر بەلباغ، بىر يول»نى ئورتاق قۇرۇش ۋە ئىككى دۆلەتنىڭ تەرەققىيات قۇرۇلۇشىنى ياخشى بىخەتەر مۇھىت بىلەن تەمىنلىشى كېرەك.

جاپاروف مۇنداق بىلدۈردى: تارىخىي ئەھمىيەتكە تولغان قەدىمىي يىپەك يولىنىڭ باشلىنىش نۇقتىسىغا كېلىپ زىيارەتتە بولغانلىقىمدىن ئىنتايىن خۇشالمەن، جۇڭگونىڭ دۆلەت ئىچىدىكى بىر قاتار مۇھىم، زور سىياسىي قارالمىلارنى مۇۋەپپەقىيەتلىك تاماملىغانلىقىنى قىزغىن تەبرىكلەيمەن، ئىشىنىمەنكى، رەئىس شى جىنپىڭنىڭ قەتئىي، كۈچلۈك رەھبەرلىكىدە، جۇڭگو ھەرقايسى ساھەدىكى تەرەققىياتتا مۇقەررەر يېڭى شانلىق مۇۋەپپەقىيەتلەرنى قولغا كەلتۈرۈپ، دۇنيادا تېخىمۇ مۇھىم رولىنى جارى قىلدۇرىدۇ. ھازىر، قىرغىزىستان - جۇڭگو مۇناسىۋىتى تارىختىكى ئەڭ ياخشى سەۋىيەدە تۇرۇۋاتىدۇ، قىرغىزىستان تەرەپ جۇڭگو تەرەپنىڭ تەيۋەن مەسىلىسى، شىنجاڭغا ئالاقىدار، شياڭگاڭغا ئالاقىدار قاتارلىق يادرولۇق مەنپەئەت مەسىلىسىدىكى مەيدانىنى قوللاشتا قەتئىي تەۋرەنمەيدۇ، جۇڭگو تەرەپ ئوتتۇرىغا قويغان يەرشارىۋى خەۋپسىزلىك تەشەببۇسى، يەرشارىۋى تەرەققىيات تەشەببۇسىنى قوللايدۇ، جۇڭگو تەرەپ بىلەن بىر - بىرىنى قەتئىي قوللاپ، زىچ ئالاقىلىشىپ ۋە ھەمكارلىشىپ، ئىككى دۆلەت ۋە رايوننىڭ خەۋپسىزلىكى ھەم تەرەققىياتىنى ئورتاق ئىلگىرى سۈرۈشنى خالايدۇ. قىرغىزىستان تەرەپ پۈتۈن كۈچ بىلەن جۇڭگو كارخانىلىرىنى بىخەتەر، ياخشى بولغان مەبلەغ سېلىش مۇھىتى بىلەن تەمىنلەپ، «بىر بەلباغ، بىر يول»نى ئورتاق قۇرۇشنى سىجىل ئالغا سىلجىتىدۇ. بۈگۈن، بىز قىرغىزىستان - جۇڭگو مۇناسىۋىتىنى يېڭى دەۋردىكى ئومۇميۈزلۈك ئىستراتېگىيەلىك ھەمراھلىق مۇناسىۋىتى دەرىجىسىگە كۆتۈردۇق ھەم قىرغىزىستان - جۇڭگو تەقدىر ئورتاق گەۋدىسى بەرپا قىلىش توغرىسىدا بىردەكلىك ھاسىل قىلدۇق، بۇ، ئىككى دۆلەتنىڭ ھەر تەرەپلىمە ئۆزئارا مەنپەئەت يەتكۈزۈش ھەمكارلىقىنىڭ يېڭى پەللىگە كۆتۈرۈلۈشىگە مۇقەررەر تۈرتكە بولىدۇ.

جاپاروف مۇنداق بىلدۈردى: مەن پات ئارىدا ئۆتكۈزۈلىدىغان جۇڭگو − ئوتتۇرا ئاسىيا باشلىقلار يىغىنىغا نىسبەتەن زور ئۈمىدكە تولدۇم، جۇڭگو تەرەپ بىلەن بىرلىكتە بۇ يىغىننى ئوتتۇرا ئاسىيا دۆلەتلىرى بىلەن جۇڭگونىڭ ئىككى تەرەپ ۋە رايون ھەمكارلىقىنى قويۇقلاشتۇرىدىغان يېڭى سۇپىغا ئايلاندۇرۇشنى خالايمەن.

سۆھبەتتىن كېيىن، ئىككى دۆلەت باشلىقلىرى «جۇڭخۇا خەلق جۇمھۇرىيىتى بىلەن قىرغىز جۇمھۇرىيىتىنىڭ يېڭى دەۋردىكى ئومۇميۈزلۈك ئىستراتېگىيەلىك ھەمراھلىق مۇناسىۋىتى ئورنىتىش توغرىسىدىكى قوشما خىتابنامىسى»نى ئىمزالىدى ھەم ئىقتىساد - سودا، كەسىپ ۋە سېلىنما، تاموژنا، يېزا ئىگىلىكى، ئادىمىيەت قاتارلىق ساھەلەردىكى كۆپ تۈرلۈك ئىككى تەرەپ ھەمكارلىق ھۆججەتلىرىنىڭ ئىمزالىنىشىغا ئورتاق گۇۋاھ بولدى.

سەي چى، ۋاڭ يى، چىن گاڭ قاتارلىقلار يۇقىرىقى پائالىيەتلەرگە قاتناشتى.

شىنخۇا ئاگېنتلىقى، شىئەن، 5 - ئاينىڭ 18 - كۈنى تېلېگراممىسى (مۇخبىرلار جۇ چاۋ، ياڭ يىمياۋ) 5 - ئاينىڭ 18 - كۈنى چۈشتىن بۇرۇن، دۆلەت رەئىسى شى جىنپىڭ شىئەندە جۇڭگوغا جۇڭگو − ئوتتۇرا ئاسىيا باشلىقلار يىغىنىغا قاتنىشىش ھەم دۆلەت ئىشلىرى زىيارىتىدە بولۇش ئۈچۈن كەلگەن تاجىكىستان زۇڭتۇڭى راخمان بىلەن سۆھبەتلەشتى.

شى جىنپىڭ مۇنداق كۆرسەتتى: جۇڭگو بىلەن تاجىكىستان دىپلوماتىك مۇناسىۋەت ئورناتقاندىن بۇيان، ئىككى دۆلەت مۇناسىۋىتى ئىناق قوشنىدارچىلىق، دوستلۇقتىن ئىستراتېگىيەلىك ھەمراھلىق مۇناسىۋەتكە، يەنە ئومۇميۈزلۈك ئىستراتېگىيەلىك ھەمراھلىق مۇناسىۋەتكە ھالقىشنى ئىشقا ئاشۇردى. جۇڭگو - تاجىكىستان مۇناسىۋىتى چوڭقۇر تارىخىي مەنبەگە، پۇختا سىياسىي ئاساسقا، مول ھەمكارلىق ئىچكى خاس مەزمۇنىغا، كەڭ خەلق رايىنىڭ قوللىشىغا ئىگە. يېڭى ۋەزىيەتتە، جۇڭگو تەرەپ تاجىكىستان تەرەپ بىلەن بىرلىكتە تىرىشىپ، ھەرقايسى ساھەلەردىكى ھەمكارلىق سەۋىيەسىنى ئومۇميۈزلۈك ئۆستۈرۈپ، ئەۋلادمۇئەۋلاد دوستانە ئۆتىدىغان، مەنپەئەتداش ۋە تەقدىرداش بولغان، ئۆزئارا مەنپەئەت يەتكۈزۈپ ئورتاق نەپ ئالىدىغان جۇڭگو - تاجىكىستان تەقدىر ئورتاق گەۋدىسى بەرپا قىلىشقا تۈرتكە بولۇشنى خالايدۇ.

شى جىنپىڭ مۇنداق تەكىتلىدى: ئىككى تەرەپ ئۆزئارا ھۆرمەت قىلىش، يۈكسەك دەرىجىدە ئۆزئارا ئىشىنىش ئاساسىدا، ھەر تەرەپلىمە ئىستراتېگىيەلىك ھەمكارلىقنى چوڭقۇرلاشتۇرۇپ، ئىگىلىك ھوقۇق، مۇستەقىللىق، خەۋپسىزلىك، زېمىن پۈتۈنلۈكى قاتارلىق يادرولۇق مەنپەئەتكە ئالاقىدار مەسىلىلەردە بىر - بىرىنى قەتئىي قوللاپ، بىر - بىرىگە ئىشىنىدىغان ئىستراتېگىيەلىك ھەمراھلاردىن بولۇشى كېرەك. ئىككى تەرەپ تەرەققىيات ئىستراتېگىيەسىنى ئۇدۇللاشتۇرۇشنى كۈچەيتىپ، «بىر بەلباغ، بىر يول»نى يۇقىرى سۈپەتتە ئورتاق قۇرۇپ، ئىقتىساد - سودا، ئۆزئارا تۇتاشتۇرۇش، ئۆزئارا راۋانلاشتۇرۇش، يېزا ئىگىلىكى، چوڭ تۈر قاتارلىق جەھەتلەردىكى ھەمكارلىقنى چوڭقۇرلاشتۇرۇشى كېرەك، جۇڭگو تەرەپ تاجىكىستاننىڭ تېخىمۇ كۆپ ئەلا سۈپەتلىك يېزا ئىگىلىك مەھسۇلاتلىرىنى ئىمپورت قىلىشنى خالايدۇ. ئادىمىيەت جەھەتتىكى ئالماشتۇرۇشنى قويۇقلاشتۇرۇپ، لۇبەن ھۈنەرخانىسىنى ياخشى باشقۇرۇپ، مائارىپ، تاراتقۇ ھەمكارلىقىنى كۈچەيتىپ، جۇڭگو - تاجىكىستان دوستلۇق ھېكايىسىنى ياخشى سۆزلەپ، ئىككى دۆلەت مۇناسىۋىتىنىڭ خەلق رايى ۋە جەمئىيەت ئاساسىنى مۇستەھكەملەش كېرەك. جۇڭگو تەرەپ تاجىكىستان تەرەپ بىلەن قانۇن ئىجرا قىلىش، خەۋپسىزلىك ھەمكارلىقىنى كۈچەيتىپ، ئىككى دۆلەت ۋە رايوننىڭ ئورتاق خەۋپسىزلىكىنى قوغداپ، يەرشارىۋى تەرەققىيات تەشەببۇسى، يەرشارىۋى خەۋپسىزلىك تەشەببۇسى، يەرشارىۋى مەدەنىيلىك تەشەببۇسىنى ئەمەلىيلەشتۈرۈشكە تۈرتكە بولۇپ، كەڭ تەرەققىي قىلىۋاتقان دۆلەتلەرنىڭ ئورتاق مەنپەئىتىنى قوغداپ، ئىنسانىيەت تەقدىرى ئورتاق گەۋدىسى بەرپا قىلىشقا تۈرتكە بولۇشنى خالايدۇ. ئىشىنىمەنكى، ھەرقايسى تەرەپلەرنىڭ ئورتاق تىرىشچانلىقىدا، بۇ قېتىمقى جۇڭگو − ئوتتۇرا ئاسىيا باشلىقلار يىغىنى چوقۇم مەزمۇنى مول، نەتىجىسى مول باشلىقلار يىغىنى قىلىپ ئېچىلىپ، جۇڭگو − ئوتتۇرا ئاسىيا ھەمكارلىقىنىڭ يېڭى دەۋرىنى ئاچىدۇ.

راخمان مۇنداق بىلدۈردى: تاجىكىستان - جۇڭگو مۇناسىۋىتى يۈكسەك دەرىجىدە ئۆزئارا ئىشىنىش، ئۆزئارا ھۆرمەت قىلىش، ئۆزئارا قوللاش ئاساسىغا ئورنىتىلغان. بۇ يىل تاجىكىستان بىلەن جۇڭگو ئىستراتېگىيەلىك ھەمراھلىق مۇناسىۋىتى ئورناتقانلىقىنىڭ 10 يىللىقى، ئىككى دۆلەت مۇناسىۋىتى دۆلەتلەر ئارا ئىناق قوشنىدارچىلىق، دوستلۇق، سەمىمىي ھەمكارلىقنىڭ ئۈلگىسىگە ئايلاندى. تاجىكىستان تەرەپ قەتئىي تەۋرەنمەي بىر جۇڭگو سىياسىتىگە قاتتىق ئەمەل قىلىدۇ، قەتئىي تەۋرەنمەي تاجىكىستان بىلەن جۇڭگونىڭ ئىستراتېگىيەلىك ھەمراھلىق مۇناسىۋىتىنى راۋاجلاندۇرۇشقا كۈچ چىقىرىدۇ، تاجىكىستان - جۇڭگو تەقدىر ئورتاق گەۋدىسىنى بەرپا قىلىدۇ. بۇ، ئىككى دۆلەت ۋە ئىككى دۆلەت خەلقلىرىنىڭ تۈپ مەنپەئىتىگە ئۇيغۇن. تاجىكىستان تەرەپ جۇڭگو تەرەپ ئوتتۇرىغا قويغان يەرشارىۋى خەۋپسىزلىك تەشەببۇسى، يەرشارىۋى تەرەققىيات تەشەببۇسى، يەرشارىۋى مەدەنىيلىك تەشەببۇسىنى قوللايدۇ، تاجىكىستاننىڭ دۆلەت تەرەققىيات ئىستراتېگىيەسىنى «بىر بەلباغ، بىر يول»نى ئورتاق قۇرۇش تەشەببۇسى بىلەن چوڭقۇر ئۇدۇللاشتۇرۇشقا تۈرتكە بولۇپ، جۇڭگونىڭ تەرەققىيات تەجرىبىلىرىنى ئۆرنەك قىلىپ، ئىككى دۆلەتنىڭ ئىقتىساد - سودا، ئىشلەپچىقىرىش ئىقتىدارى، يېزا ئىگىلىكى، قاتناش، يېشىل ئىقتىساد، ئادىمىيەت قاتارلىق ساھەلەردىكى ھەمكارلىقنى كۈچەيتىشنى خالايدۇ. تاجىكىستان تەرەپ جۇڭگو تەرەپ بىلەن بىرلىكتە تۇنجى قېتىملىق جۇڭگو − ئوتتۇرا ئاسىيا باشلىقلار يىغىنىنى ياخشى ئېچىپ، جۇڭگو − ئوتتۇرا ئاسىيا مېخانىزمىنى ياخشى قۇرۇشنى خالايدۇ.

سۆھبەتتىن كېيىن، ئىككى دۆلەت باشلىقلىرى «جۇڭخۇا خەلق جۇمھۇرىيىتى بىلەن تاجىكىستان جۇمھۇرىيىتىنىڭ قوشما باياناتى»نى ئىمزالىدى، ئىقتىساد - سودا، ئۆزئارا تۇتاشتۇرۇش، ئۆزئارا راۋانلاشتۇرۇش، پەن - تېخنىكا، يەرلىكلەر ئالاقىسى قاتارلىق ساھەلەردىكى كۆپ تۈرلۈك ئىككى تەرەپ ھەمكارلىقى ھۆججەتلىرىنىڭ ئىمزالىنىشىغا ئورتاق گۇۋاھ بولدى.

سەي چى، ۋاڭ يى، چىن گاڭ قاتارلىقلار يۇقىرىقى پائالىيەتلەرگە قاتناشتى.

شىنخۇا ئاگېنتلىقى، شىئەن، 5 - ئاينىڭ 18 - كۈنى تېلېگراممىسى (مۇخبىرلار جۇ چاۋ، جياڭ چېنرۇڭ) 5 - ئاينىڭ 18 - كۈنى چۈشتىن كېيىن، دۆلەت رەئىسى شى جىنپىڭ شىئەندە جۇڭگوغا جۇڭگو − ئوتتۇرا ئاسىيا باشلىقلار يىغىنىغا قاتناشقىلى كەلگەن تۈركمەنىستان زۇڭتۇڭى بەردىمۇھەممەدوف بىلەن كۆرۈشتى.

شى جىنپىڭ مۇنداق كۆرسەتتى: جۇڭگو بىلەن تۈركمەنىستان دىپلوماتىك مۇناسىۋەت ئورناتقان 31 يىلدىن بۇيان، ئىككى دۆلەت باشتىن - ئاخىر ئۆزئارا ھۆرمەت قىلىش، ئۆزئارا مەنپەئەت يەتكۈزۈپ ئورتاق نەپ ئېلىش پىرىنسىپىدا چىڭ تۇرۇپ، دوستانە ھەمكارلىقنى ئالغا سىلجىتتى. بۇ يىل 1 - ئايدا سىز جۇڭگودا مۇۋەپپەقىيەتلىك ھالدا دۆلەت ئىشلىرى زىيارىتىدە بولدىڭىز، بىز ئىككى دۆلەت مۇناسىۋىتىنى ئومۇميۈزلۈك ئىستراتېگىيەلىك ھەمراھلىق مۇناسىۋىتىگە كۆتۈرۈپ، ئىككى تەرەپ قاتلىمىدا تەقدىر ئورتاق گەۋدىسىنى ئەمەلدە كۆرسىتىپ، جۇڭگو - تۈركمەنىستان مۇناسىۋىتىنىڭ تەرەققىياتىدا يېڭى سەھىپە ئېچىشنى جاكارلىدۇق. جۇڭگو جۇڭگوچە زامانىۋىلاشتۇرۇش ئارقىلىق جۇڭخۇا مىللىتىنىڭ ئۇلۇغ گۈللىنىشىنى ئومۇميۈزلۈك ئالغا سىلجىتماقتا، تۈركمەنىستان «قۇدرەتلىك دۆلەتنىڭ يېڭى دەۋردىكى گۈللىنىشى» نىشانىغا قاراپ ئىلگىرىلىمەكتە، جۇڭگو - تۈركمەنىستان مۇناسىۋىتىنىڭ تەرەققىيات يوشۇرۇن كۈچى غايەت زور، ئىستىقبالى پارلاق. جۇڭگو تەرەپ تۈركمەنىستان تەرەپ بىلەن بىرلىكتە تىرىشىپ، ئىككى دۆلەت مۇناسىۋىتىنى ئۈزلۈكسىز ئالغا سىلجىتىپ، ئىككى دۆلەت خەلقلىرىگە تېخىمۇ ياخشى بەخت يارىتىشنى خالايدۇ.

شى جىنپىڭ مۇنداق تەكىتلىدى: جۇڭگو تەرەپ تۈركمەنىستاننىڭ دۆلەتنىڭ ئىگىلىك ھوقۇقى، مۇستەقىللىقى، زېمىن پۈتۈنلۈكىنى قوغدىشىنى قەتئىي قوللايدۇ، تۈركمەنىستاننىڭ ئۆز دۆلىتىنىڭ دۆلەت ئەھۋالىغا ئۇيغۇن كېلىدىغان تەرەققىيات يولىدا مېڭىشىنى قەتئىي قوللايدۇ، باشتىن - ئاخىر تۈركمەنىستان تەرەپنىڭ ئىشىنىشكە ئەرزىيدىغان دوستى ۋە ھەمراھى بولىدۇ. ئىككى تەرەپ ئۆزئارا تولۇقلاش ئەۋزەللىكىنى تولۇق جارى قىلدۇرۇپ، ھەمكارلىق يوشۇرۇن كۈچىنى قويۇپ بېرىپ، ھەمكارلىقنىڭ چوڭقۇرلۇقى، كەڭلىكى ۋە كۆلىمىنى ئومۇميۈزلۈك ئۆستۈرۈشى كېرەك. جۇڭگو تەرەپ تۈركمەنىستان تەرەپ بىلەن ئىقتىساد - سودا، تەبىئىي گاز، ئۆزئارا تۇتاشتۇرۇش، ئۆزئارا راۋانلاشتۇرۇش قاتارلىق ساھەلەردىكى ھەمكارلىقنى كېڭەيتىپ، خەۋەرلىشىش، ئالەم قاتنىشى قاتارلىق يۇقىرى، يېڭى تېخنىكا ھەمكارلىقىنى كېڭەيتىشنى خالايدۇ، تېخىمۇ كۆپ جۇڭگو كارخانىلىرىنىڭ تۈركمەنىستانغا بېرىپ مەبلەغ سېلىپ كەسىپنى گۈللەندۈرۈشىنى قوللايدۇ، ئىككى دۆلەتنىڭ يەرلىك ئۆلكە، ئوبلاستلىرىمۇ ھەرىكەتكە كېلىپ، ئۆز ئەۋزەللىكىگە بىرلەشتۈرۈپ، تېخىمۇ كۆپ نىشانلىق ھەمكارلىقنى قانات يايدۇرۇشى كېرەك. ئىككى تەرەپ بۇ يىل ۋە كېلەر يىلى ئۆزئارا مەدەنىيەت يىلى ئۆتكۈزۈشنى پۇرسەت بىلىپ، ئادىمىيەت جەھەتتىكى ئالماشتۇرۇشنى چوڭقۇرلاشتۇرۇشى كېرەك.

شى جىنپىڭ مۇنداق كۆرسەتتى: جۇڭگو بىلەن ئوتتۇرا ئاسىيا دۆلەتلىرى چىش بىلەن كالپۇكتەك يېقىن ئۆتىدىغان، تىنچ - ئامانلىق ۋە خەۋپ - خەتەردە بىللە بولىدىغان، تەقدىر ئورتاق گەۋدىسى. جۇڭگو تەرەپ بەش دۆلەت بىلەن ئورتاق تىرىشىپ، بۇ قېتىمقى جۇڭگو − ئوتتۇرا ئاسىيا باشلىقلار يىغىنىنى ياخشى ئېچىپ، جۇڭگو − ئوتتۇرا ئاسىيا ھەمكارلىقىنىڭ پۇختا تەرەققىياتىغا تۈرتكە بولۇپ، ئوتتۇرا ئاسىيا رايونىنىڭ تىنچلىقى، مۇقىملىقى ۋە ئەبەدىي ئەمىنلىكىنى قوغداشنى ئۈمىد قىلىدۇ.

بەردىمۇھەممەدوف مۇنداق بىلدۈردى: تۈركمەنىستان بىلەن جۇڭگونىڭ دوستلۇقى ۋاقىت ئۇزارغانسېرى يېڭىلانماقتا، تۈركمەنىستان - جۇڭگو مۇناسىۋىتى ئۆزئارا ھۆرمەت قىلىش، باراۋەر بولۇش ۋە ئۆزئارا مەنپەئەت يەتكۈزۈپ ئورتاق نەپ ئېلىش ئاساسىدا ئورنىتىلغان، ئىستىقبالى پارلاق. تۈركمەنىستان تەرەپ جۇڭگو بىلەن بولغان ئومۇميۈزلۈك ئىستراتېگىيەلىك ھەمراھلىق مۇناسىۋىتىنى يۈكسەك قەدىرلەيدۇ، جۇڭگو تەرەپ بىلەن بىرلىكتە «يىپەك يولىنى گۈللەندۈرۈش» ئىستراتېگىيەسىنى «بىر بەلباغ، بىر يول»نى ئورتاق قۇرۇش تەشەببۇسى بىلەن ئۇدۇللاشتۇرۇشنى ئالغا سىلجىتىپ، تۈركمەنىستان - جۇڭگو ھەمكارلىق كومىتېتىنىڭ رولىنى جارى قىلدۇرۇپ، ئېنېرگىيە، يېڭىلىق يارىتىش قاتارلىق نۇقتىلىق ساھەلەردىكى ھەمكارلىقنى چوڭقۇرلاشتۇرۇپ، ئادىمىيەت جەھەتتىكى ئالماشتۇرۇشنى قويۇقلاشتۇرۇشنى خالايدۇ. جۇڭگو − ئوتتۇرا ئاسىيا مېخانىزمى دوستلۇق ۋە ھەمكارلىقنى چوڭقۇرلاشتۇرۇشنى يېڭى پۇرسەت بىلەن تەمىنلەيدۇ، دۇنياغا نىسبەتەنمۇ مۇھىم ئەھمىيەتكە ئىگە. تۈركمەنىستان تەرەپ بۇنىڭغا يۈكسەك ئەھمىيەت بېرىدۇ، جۇڭگو تەرەپ بىلەن زىچ ئالاقىلىشىپ، ھەمكارلىشىپ، خىرىسقا ئورتاق تاقابىل تۇرۇپ، رايوننىڭ خەۋپسىزلىكى، مۇقىملىقى ۋە تەرەققىياتى، گۈللىنىشىنى ئىلگىرى سۈرۈشنى خالايدۇ.

كۆرۈشۈشتىن كېيىن، ئىككى دۆلەت باشلىقلىرى پەن - تېخنىكا، تاموژنا قاتارلىق ساھەلەردىكى كۆپ تۈرلۈك ئىككى تەرەپ ھەمكارلىق ھۆججەتلىرىنىڭ ئىمزالىنىشىغا ئورتاق گۇۋاھ بولدى.

سەي چى، ۋاڭ يى، چىن گاڭ قاتارلىقلار يۇقىرىقى پائالىيەتلەرگە قاتناشتى.

شىنخۇا ئاگېنتلىقى، شىئەن، 5 - ئاينىڭ 18 - كۈنى تېلېگراممىسى (مۇخبىرلار جۇ چاۋ، جاڭ بىن) 5 - ئاينىڭ 18 - كۈنى چۈشتىن كېيىن، دۆلەت رەئىسى شى جىنپىڭ شىئەندە جۇڭگوغا جۇڭگو − ئوتتۇرا ئاسىيا باشلىقلار يىغىنىغا قاتنىشىش ھەم دۆلەت ئىشلىرى زىيارىتىدە بولۇش ئۈچۈن كەلگەن ئۆزبېكىستان زۇڭتۇڭى مىرزىيويېف بىلەن سۆھبەتلەشتى.

شى جىنپىڭ مۇنداق كۆرسەتتى: بۇلتۇر 9 - ئايدا، مەن ئۆزبېكىستاندا دۆلەت ئىشلىرى زىيارىتىدە بولدۇم، بىز جۇڭگو بىلەن ئۆزبېكىستاننىڭ ئىككى تەرەپ قاتلىمىدا تەقدىر ئورتاق گەۋدىسىنى ئەمەلدە كۆرسىتىشنى ئورتاق جاكارلاپ، ئىككى دۆلەت مۇناسىۋىتىنىڭ يېڭى ئورنىنى بېكىتتۇق. جۇڭگو جۇڭگوچە زامانىۋىلاشتۇرۇشنى ئومۇميۈزلۈك ئالغا سىلجىتماقتا، ئۆزبېكىستانمۇ «يېڭى ئۆزبېكىستان»نى ئومۇميۈزلۈك قۇرماقتا، ئىككىلا دۆلەت ئىسلاھات ۋە تەرەققىياتنىڭ ئاچقۇچلۇق باسقۇچىدا تۇرماقتا، خەلقئارا ۋەزىيەت ئۆزگىرىشىنىڭ سىنىقىغا دۇچ كەلمەكتە. جۇڭگو تەرەپ ئۆزبېكىستان تەرەپ بىلەن بىرلىكتە ھەر تەرەپلىمە ھەمكارلىقنى چوڭقۇرلاشتۇرۇپ، جۇڭگو - ئۆزبېكىستان تەقدىر ئورتاق گەۋدىسى بەرپا قىلىشنى خالايدۇ.

شى جىنپىڭ مۇنداق تەكىتلىدى: جۇڭگو تەرەپ ئۆزبېكىستاننىڭ دۆلەتنىڭ ئىگىلىك ھوقۇقى، مۇستەقىللىقى، زېمىن پۈتۈنلۈكىنى قوغدىشىنى قەتئىي قوللايدۇ، ئۆزبېكىستاننىڭ ئۆز دۆلىتىنىڭ دۆلەت ئەھۋالىغا ئۇيغۇن كېلىدىغان تەرەققىيات يولىدا مېڭىشىنى قەتئىي قوللايدۇ. ئىككى تەرەپ بىر - بىرىنى قەتئىي قوللاپ، بىر - بىرىگە تايىنىدىغان، بىر - بىرىنى قەدىرلەيدىغان دوست ۋە ھەمراھلاردىن بولۇشى كېرەك. ئىقتىساد - سودا ۋە سېلىنما ھەمكارلىقىنى كېڭەيتىپ، ئۆزئارا تۇتاشتۇرۇش، ئۆزئارا راۋانلاشتۇرۇش قۇرۇلۇشىنى چوڭقۇرلاشتۇرۇپ، ئېنېرگىيە ۋە داۋالاش، سەھىيە ھەمكارلىقىنى كېڭەيتىپ، يەرلىك، ئادىمىيەت ۋە نامراتلارنى ئازايتىش جەھەتتىكى ئالماشتۇرۇش، ھەمكارلىقنى پائال قانات يايدۇرۇشى كېرەك. ئىككى تەرەپ يەنە تېررورلۇققا قارشى تۇرۇش ۋە ئارىلىشىشقا قارشى تۇرۇش ھەمكارلىقىنى قانات يايدۇرۇپ، رايون خەۋپسىزلىكى، مۇقىملىقىنى ئىلگىرى سۈرۈش ئۈچۈن تېگىشلىك تۆھپە قوشۇشى كېرەك.

شى جىنپىڭ مۇنداق كۆرسەتتى: جۇڭگو − ئوتتۇرا ئاسىيا باشلىقلار يىغىنى جۇڭگو − ئوتتۇرا ئاسىيا مۇناسىۋىتى تارىخىدىكى يېڭى ئابىدە بولۇپ، جۇڭگو − ئوتتۇرا ئاسىيا ھەمكارلىقىنىڭ يېڭى دەۋرىنى ئاچىدۇ. جۇڭگو تەرەپ ئۆزبېكىستان تەرەپ بىلەن قول تۇتۇشۇپ، جۇڭگو − ئوتتۇرا ئاسىيا مېخانىزمى قۇرۇلۇشىنى ئالغا سىلجىتىپ، تېخىمۇ زىچ بولغان جۇڭگو − ئوتتۇرا ئاسىيا تەقدىر ئورتاق گەۋدىسى بەرپا قىلىشنى خالايدۇ.

مىرزىيويېف مۇنداق بىلدۈردى: جۇڭگو كوممۇنىستىك پارتىيەسى 20 - قۇرۇلتىيى ۋە بۇ يىلقى جۇڭگو ئىككى يىغىنىنىڭ مۇۋەپپەقىيەتلىك ئېچىلىشى بۈگۈنكى دۇنيادىكى مۇھىم ئەھمىيەتكە ئىگە تارىخىي ئىش بولۇپ، رەئىس شى جىنپىڭنىڭ ئۇلۇغۋار تەرەققىيات ئىستراتېگىيەسىنىڭ بارلىق جۇڭگو خەلقىنىڭ ھىمايىسى ۋە قوللىشىغا ئېرىشكەنلىكىنى تولۇق ئىپادىلىدى. ئىشىنىمەنكى، رەئىس شى جىنپىڭنىڭ رەھبەرلىكىدە، جۇڭگو چوقۇم سوتسىيالىستىك زامانىۋىلاشقان قۇدرەتلىك دۆلەتنى قەرەلىدە ئومۇميۈزلۈك قۇرۇپ چىقىپ، دۇنيانىڭ تىنچلىقى ۋە تەرەققىياتى ئۈچۈن مۇھىم تۆھپە قوشىدۇ. ئۆزبېكىستان تەرەپ بىر جۇڭگو سىياسىتىدە قەتئىي چىڭ تۇرىدۇ، جۇڭگو تەرەپنىڭ ئىشەنچلىك، ھاۋا رايى چەكلىمىسىگە ئۇچرىمايدىغان ئىستراتېگىيەلىك ھەمراھى. ئۆزبېكىستان تەرەپ جۇڭگو تەرەپنىڭ نامراتلارنى ئازايتىش تەجرىبىلىرىنى ئۆگىنىپ، ئۆرنەك ئېلىپ، ھەرقايسى ساھەلەردىكى ھەمكارلىقنى سىجىل چوڭقۇرلاشتۇرۇپ، ئادىمىيەت جەھەتتىكى ئالماشتۇرۇشنى كۈچەيتىپ، يەرشارىۋى تەرەققىيات تەشەببۇسى، يەرشارىۋى خەۋپسىزلىك تەشەببۇسى، يەرشارىۋى مەدەنىيلىك تەشەببۇسىنى پائال ئەمەلىيلەشتۈرۈپ، ئۆزبېكىستان - جۇڭگو ئومۇميۈزلۈك ئىستراتېگىيەلىك ھەمراھلىق مۇناسىۋىتىنىڭ يېڭى پەللىگە كۆتۈرۈلۈشىگە تۈرتكە بولۇشنى خالايدۇ. ئۆزبىكىستان تەرەپ جۇڭگو تەرەپ بىلەن جۇڭگو − ئوتتۇرا ئاسىيا مېخانىزمى قاتارلىق كۆپ تەرەپلىك ھەمكارلىقنى قويۇقلاشتۇرۇپ، رايون خەۋپسىزلىكى ۋە تەرەققىياتىنى ئورتاق ئىلگىرى سۈرۈشنى خالايدۇ.

سۆھبەتتىن كېيىن، ئىككى دۆلەت باشلىقلىرى «جۇڭخۇا خەلق جۇمھۇرىيىتى بىلەن ئۆزبېكىستان جۇمھۇرىيىتىنىڭ قوشما باياناتى»نى ئىمزالىدى، «جۇڭخۇا خەلق جۇمھۇرىيىتى بىلەن ئۆزبېكىستان جۇمھۇرىيىتىنىڭ يېڭى دەۋردىكى ئومۇميۈزلۈك ئىستراتېگىيەلىك ھەمراھلىق مۇناسىۋىتىنىڭ تەرەققىيات يىرىك پىلانى (2027 − 2023)»نى ماقۇللىدى، ئالدىن مەبلەغ سېلىش تۈرى، نامراتلىقنى ئازايتىش، يېزا ئىگىلىك مەھسۇلاتلىرى سودىسى، تەكشۈرۈش - كارانتىن قىلىش، يەرلىك ھەمكارلىق قاتارلىق ساھەلەردىكى كۆپ تۈرلۈك ئىككى تەرەپ ھەمكارلىق ھۆججەتلىرىنىڭ ئىمزالىنىشىغا ئورتاق گۇۋاھ بولدى.

سەي چى، ۋاڭ يى، چىن گاڭ قاتارلىقلار يۇقىرىقى پائالىيەتلەرگە قاتناشتى.