شىنخۇا ئاگېنتلىقى، بېيجىڭ، 5 ـ ئاينىڭ 19 ـ كۈنى تېلېگراممىسى 5 ـ ئاينىڭ 19 ـ كۈنى، دۆلەت رەئىسى شى جىنپىڭ ئەرەب دۆلەتلىرى ئىتتىپاقى باشلىقلار كېڭىشى يىغىنىنىڭ نۆۋەتچى رەئىسى − سەئۇدى ئەرەبىستانى پادىشاھى سالمانغا تەبرىك خېتى ئەۋەتىپ، 32 ـ نۆۋەتلىك ئەرەب دۆلەتلىرى ئىتتىپاقى باشلىقلار كېڭىشى يىغىنىنىڭ جىددەدە ئېچىلغانلىقىنى تەبرىكلىدى.

شى جىنپىڭ مۇنداق كۆرسەتتى: ئەرەب دۆلەتلىرى ئىتتىپاقى ئۇزاقتىن بۇيان ئەرەب دۆلەتلىرىنىڭ بىرلىشىپ ئۆزىنى قۇدرەت تاپقۇزۇشىغا تۈرتكە بولۇشقا كۈچ چىقىرىپ، ئوتتۇرا شەرق رايونىنىڭ تىنچلىقى، مۇقىملىقى ۋە تەرەققىياتىنى ئىلگىرى سۈردى. مەن ئەرەب دۆلەتلىرىنىڭ ئىتتىپاقلىشىپ ئۆزىنى قۇدرەت تاپقۇزۇش يولىدا داۋاملىق يېڭى قەدەم تاشلاپ، يېڭى نەتىجىلەرنى قولغا كەلتۈرگەنلىكىنى كۆرۈپ ئىنتايىن خۇشال بولدۇم. سەئۇدى ئەرەبىستانى كۆپ قۇتۇپلاشقان دۇنيادىكى مۇھىم كۈچ بولۇپ، ئەرەب دۆلەتلىرىنىڭ ئىتتىپاقلىقى ۋە ھەمكارلىقىنى كۈچەيتىش، ئوتتۇرا شەرق رايونىنىڭ تىنچلىقى، مۇقىملىقىنى قوغداشقا پائال تۆھپە قوشتى، مەن بۇنىڭغا ئاپىرىن ئېيتىمەن.

شى جىنپىڭ مۇنداق تەكىتلىدى: جۇڭگو بىلەن ئەرەب دۆلەتلىرىنىڭ ئەنئەنىۋى دوستلۇق رىشتى مىڭ يىلدىن ھالقىپ، ئۇزاق تارىخىي جەرياندا مۇستەھكەملىنىپ كەلدى. يېقىنقى يىللاردىن بۇيان، ئىككى تەرەپنىڭ ئىستراتېگىيەلىك ھەمراھلىق مۇناسىۋىتى ئۈزلۈكسىز تەرەققىي قىلىپ، مول نەتىجىلەر قولغا كەلتۈرۈلۈپ، جەنۇب ـ جەنۇب ھەمكارلىقى، ئۆزئارا مەنپەئەت يەتكۈزۈپ ئورتاق نەپ ئېلىش ئۈلگىسىگە ئايلاندى. بۇلتۇر 12 ـ ئايدا، تۇنجى نۆۋەتلىك جۇڭگو − ئەرەب دۆلەتلىرى باشلىقلار يىغىنى رىيادتا مۇۋەپپەقىيەتلىك ئېچىلدى، جۇڭگو − ئەرەب دۆلەتلىرى رەھبەرلىرى يېڭى دەۋرگە يۈزلەنگەن جۇڭگو − ئەرەب دۆلەتلىرى تەقدىر ئورتاق گەۋدىسىنى پۈتۈن كۈچ بىلەن بەرپا قىلىپ، جۇڭگو − ئەرەب دۆلەتلىرىنىڭ ئىتتىپاقلىقى، ھەمكارلىقىنى كۈچەيتىپ، ھەرقايسىسى مىللەتنى گۈللەندۈرۈشكە كۈچ قوشۇپ، رايون تىنچلىقى، تەرەققىياتىنى ئىلگىرى سۈرۈپ، خەلقئارا ئادىللىق، ھەققانىيلىقنى قوغداشقا بىردەك قوشۇلدى، بۇ، جۇڭگو − ئەرەب دۆلەتلىرى مۇناسىۋىتى تەرەققىياتىدىكى دەۋر بۆلگۈچ ئابىدە. كەلگۈسىگە نەزەر سالغىنىمىزدا، جۇڭگو تەرەپ ئەرەب دۆلەتلىرى بىلەن بىرلىكتە جۇڭگو − ئەرەب دۆلەتلىرى دوستلۇق روھىنى ئەۋج ئالدۇرۇپ، تۇنجى نۆۋەتلىك جۇڭگو − ئەرەب دۆلەتلىرى باشلىقلار يىغىنىنىڭ نەتىجىلىرىنى ياخشى ئەمەلىيلەشتۈرۈپ، تېخىمۇ يۇقىرى سەۋىيەدىكى جۇڭگو − ئەرەب دۆلەتلىرى ئىستراتېگىيەلىك ھەمراھلىق مۇناسىۋىتىنى بەرپا قىلىپ، جۇڭگو − ئەرەب دۆلەتلىرى دوستلۇقىنىڭ يېڭى سەھىپىسىنى داۋاملىق پۈتۈشنى خالايدۇ.