ئانار بۇلۇت\شىنجاڭ گېزىتى خەۋىرى (مۇخبىر يۈ مېڭفەن خەۋەر قىلىدۇ) 10-ئاينىڭ 19-كۈنى، مۇخبىرنىڭ شىنجاڭ مېتېئورولوگىيە ئىستانسىسىدىن ئىگىلىشىچە، بۈگۈن ئىلى قازاق ئاپتونوم ئوبلاستى، بورتالا موڭغۇل ئاپتونوم ئوبلاستىنىڭ غەربىي قىسمى، تىيانشان تېغىنىڭ شىمالىي يانباغرى، تىيانشان تېغىنىڭ تاغلىق رايونلىرى، جەنۇبىي شىنجاڭنىڭ غەربىي قىسمىدىكى تاغلىق رايونلار، قومۇل شەھىرىنىڭ شىمالىي قىسمىدىكى تاغلىق رايونلار قاتارلىق جايلارنىڭ قىسمەن جايلىرىدا سىم-سىم ياكى ئازراق يامغۇر ياغىدىكەن ۋە ياكى يامغۇر قارغا ئۆزگىرىدىكەن، بۇنىڭ ئىچىدە، تاغلىق رايونلارنىڭ قىسمەن جايلىرىدا ئوتتۇراھال ياكى قاتتىق يامغۇر ياغىدىكەن ياكى يامغۇر قارغا ئۆزگىرىدىكەن ۋە ياكى قار ياغىدىكەن؛ شەرقىي شىنجاڭدىكى شامال ئېغىزلىرىدا 9 بالدىن 10 بالغىچە غەربىي شىمال ئۆتكۈنچى بورىنى چىقىدىكەن، جەنۇبىي شىنجاڭدىكى تارىم ئويمانلىقىدا 5 بالدىن 6 بالغىچە قىيپاش شەرق شامىلى چىقىدىكەن، 8 بالدىن 9 بالغىچە ئۆتكۈنچى بوران چىقىدىكەن، ھەمدە ئوخشىمىغان دەرىجىدە چاڭ-توزانلىق ھاۋارايى كۆرۈلىدىكەن، تېمپېراتۇرا داۋاملىق بىرئاز تۆۋەنلەيدىكەن؛ پۈتۈن شىنجاڭنىڭ باشقا رايونلىرىدا ھاۋا ئوچۇق ياكى بۇلۇتلۇق بولىدىكەن، شامال كۈچى ئانچە كۈچلۈك بولمايدىكەن.

　　ئانار بۇلۇت\شىنجاڭ گېزىتى مۇخبىرى ياڭ ۋېي فوتوسى

　　ئۈرۈمچى شەھىرىدە ئازراق يامغۇر يېغىپ كېيىن بۇلۇتلىنىدۇ، ئەڭ يۇقىرى تېمپېراتۇرا 8 سېلسىيە گىرادۇس، ئەڭ تۆۋەن تېمپېراتۇرا 4 سېلسىيە گىرادۇس بولىدۇ، 4 بالدىن 5 بالغىچە غەربىي شىمال شامىلى چىقىدۇ.

　　مېتېئورولوگىيە تارماقلىرى شۇنى ئەسكەرتىدۇكى، بۈگۈن، ئەتە ئىككى كۈن شىمالىي شىنجاڭنىڭ كۆپ قىسىم رايونلىرى، تىيانشان تېغىنىڭ تاغلىق رايونلىرى، جەنۇبىي شىنجاڭنىڭ غەربىي قىسمىدىكى تاغلىق رايونلار قاتارلىق جايلاردا يامغۇر، قار يېغىپ تېمپېراتۇرا تۆۋەنلەپ، بوران چىقىپ يېزا ئىگىلىك، چارۋىچىلىق ئىشلەپچىقىرىشى، يول قاتنىشى قاتارلىقلارغا تەسىر كۆرسىتىدۇ، ئالدىنى ئېلىش، تەييارلىق خىزمەتلىرىنى ياخشى ئىشلەش كېرەك.

　　بۈگۈن سىم-سىم ياكى ئازراق يامغۇرنىڭ تەسىرىگە ئۇچرايدىغان يول بۆلەكلىرى: G30، G312 لىنىيەسىنىڭ قورغاستىن داۋانچىڭغىچە بولغان بۆلىكى، G3015 لىنىيەسى، G3016 لىنىيەسى، G216 لىنىيەسىنىڭ ئالتايدىن خوۋشياغىچە بولغان بۆلىكى، G217 لىنىيەسىنىڭ ئالتايدىن ئاغۇغىچە بولغان بۆلىكى، G7 لىنىيەسى، بۇنىڭ ئىچىدە،  G30، G312 لىنىيەسىنىڭ گوزىگوۋدىن توتوغىچە بولغان بۆلىكى، G3015 لىنىيەسىنىڭ دۆربىلجىندىن تيېچاڭگوۋغىچە بولغان بۆلىكى، G3016 لىنىيەسى، G217 لىنىيەسىنىڭ چورمادىن بايىنغولىنغىچە بولغان بۆلىكى، G218 لىنىيەسىنىڭ غۇلجىدىن ناراتقىچە بولغان بۆلىكىنىڭ قىسمەن جايلىرىدا ئوتتۇراھال يامغۇر ياغىدۇ ياكى يامغۇر قارغا ئۆزگىرىدۇ.

　　شىنجاڭ يېزا ئىگىلىك مېتېئورولوگىيە ئىستانسىسىنىڭ ئالدىن مەلۇماتىغا ئاساسلانغاندا، بۈگۈن ۋە ئەتە ئىككى كۈننىڭ ھاۋارايى شارائىتى جەنۇبىي شىنجاڭ رايونىنىڭ كۈزلۈك يىغىمىغا ماس كېلىدىكەن، شىمالىي شىنجاڭدىكى قىسمەن رايونلارنىڭ كۈزلۈك يىغىمىغا ماس كەلمەيدىكەن. جەنۇبىي شىنجاڭ رايونىنىڭ پايدىلىق ھاۋارايىنى چىڭ تۇتۇپ، پاختا ۋە پىشقان كۆممىقوناقلارنى ۋاقتىدا يىغىۋېلىشى، رايونلارنىڭ تېخى ئورۇنداپ بولالمىغان كۈزگى بۇغداي تېرىش ۋەزىپىسىنى چىڭ تۇتۇپ قانات يايدۇرۇشى تەۋسىيە قىلىنىدۇ. شىمالىي شىنجاڭ رايونى كۈزلۈك يىغىم سۈرئىتىنى مۇۋاپىق تەڭشەپ، كۈزگى بۇغداي تېرىش خىزمىتىنى مۇۋاپىق ئورۇنلاشتۇرۇپ، پايدىسىز ھاۋارايىنىڭ تەسىرىنى ئازايتىشى كېرەك.