ئانار بۇلۇت \ شىنجاڭ گېزىتى ئەسلىي ئىجادىيىتى

ئانار بۇلۇت \ شىنجاڭ گېزىتى خەۋىرى (مۇخبىر يۈ مېڭفەن) توققۇز ئاي قورساق كۆتۈرۈپ، ساغلام بوۋاقنى ئوڭۇشلۇق يەڭگىش ھەر بىر ھامىلىدار ئايال ئەڭ ئارزۇ قىلىدىغان ئىش. ھەر يىلى 9- ئاينىڭ 12- كۈنى جۇڭگونىڭ كەمتۈك تۇغۇلۇشنىڭ ئالدىنى ئېلىش كۈنى، بۇ يىلقى باش تېما − «كەمتۈك تۇغۇلۇشنىڭ ئالدىنى ئېلىپ، ئىلمىي ئۇسۇلدا ساغلام ھامىلىدار بولۇش». تويدىن بۇرۇن، ھامىلىدار بولۇشتىن ئىلگىرى، ھامىلىدارلىق مەزگىلى قاتارلىق ئوخشاش بولمىغان باسقۇچلاردا قانداق تەدبىرلەرنى قوللانغاندا، كەمتۈك تۇغۇلۇشنىڭ تېخىمۇ ئۈنۈملۈك ئالدىنى ئالغىلى بولىدۇ؟ مۇخبىر ئۈرۈمچى شەھەرلىك ئانا- بالىلار ساقلىقنى ساقلاش دوختۇرخانىسى تۇغۇتتىن ئىلگىرىكى دىياگنوز قويۇش مەركىزىنىڭ مۇئاۋىن مۇدىر ۋىراچى لى خۇيجۈننى زىيارەت قىلدى.

　تۇغما كەمتۈكلۈك دېگىنىمىز، بوۋاقتا تۇغۇلۇشتىن ئىلگىرى ئىرسىيەت، مۇھىت قاتارلىق ئامىللارنىڭ تەسىرىگە ئۇچراپ، ئانىنىڭ قورسىقىدىكى چېغىدىلا يۈز بەرگەن شەكىل، قۇرۇلما، ئىقتىدار، مېتابولىزم، روھىىي، ھەرىكەت قاتارلىق جەھەتلەردىكى نورمالسىزلىقنى كۆرسىتىدۇ. دائىم كۆرۈلىدىغان كەمتۈك تۇغۇلۇش مېڭىگە تۇغما سۇ يىغىلىپ قېلىش، ئومۇرتقا يېرىقى، تۇغما يۈرەك كېسىلى، تۇغما خىروموسوما كېسىلى، كالپۇك- تاڭلاي يېرىقىنى ئۆز ئىچىگە ئالىدۇ. 

　لى خۇيجۈننىڭ تونۇشتۇرۇشىچە، كەمتۈك بالا تۇغۇش خەۋپى يۇقىرى كىشىلەر توپى  35 ياشقا توشقان ياكى ئۇنىڭدىن ئاشقان ھامىلىدار ئاياللار، تۇغۇتتىن ئىلگىرى تاسقاپ تەكشۈرگەندىن كېيىنكى خەۋپى يۇقىرى كىشىلەر توپى، ئىلگىرى خىروموسوما كېسىلىگە گىرىپتار بولغان بالا تۇغقان ئاياللار، تۇغۇتتىن ئىلگىرى تەكشۈرۈشتە ھامىلىنىڭ خىروموسوما كېسىلىگە گىرىپتار بولغانلىقىدىن گۇمانلانغان ھامىلىدار ئاياللار، ئەر- خوتۇن بىر تەرەپ خىروموسوما بىنورماللىقىنى ئېلىپ يۈرگۈچى بولغانلار قاتارلىقلارنى ئۆز ئىچىگە ئالىدىكەن. بالدۇر بايقاش، بالدۇر دىياگنوز قويۇش، بالدۇر ئارىلىشىش كەمتۈك تۇغۇلۇش خەۋپىنى ئازايتىش، بىماردا ئورنىنى تولدۇرغىلى بولمايدىغان ئېغىر كېسەللىك ئاسارىتى قېلىپ قېلىشنىڭ ئالدىنى ئېلىشتىكى مۇھىم ۋاسىتە ئىكەن. قىسمەن بىمارلارغا ياكى گېن ئېلىپ يۈرگۈچىلەرگە مۇناسىپ تېببىي جەھەتتىن ئارىلىشىش- داۋالاش تەدبىرلىرىنى قوللانغاندا، بۇنداق كېسەللىكنىڭ يۈز بېرىشىنى ئۈنۈملۈك ئازايتقىلى بولىدىكەن. 

　دۆلىتىمىز ئۈچ دەرىجىلىك ئالدىنى ئېلىش تەدبىرىنى قوللىنىپ كەمتۈك تۇغۇلۇشنىڭ ئالدىنى ئالىدۇ: بىرىنچى دەرىجىلىك ئالدىنى ئېلىشتا تويدىن بۇرۇن تەكشۈرىدۇ ۋە ھامىلىدار بولۇشتىن بۇرۇن تەكشۈرىدۇ، ئىككىنچى دەرىجىلىك ئالدىنى ئېلىشتا ھامىلىدارلىق مەزگىلىدە سالامەتلىكىنى ئاسرايدۇ، ئۈچىنچى دەرىجىلىك ئالدىنى ئېلىشتا يېڭى تۇغۇلغان بوۋاقنى تاسقاپ تەكشۈرۈپ كېسەللىكنىڭ ئالدىنى ئالىدۇ. ئالدىنى ئېلىش تەدبىرلىرىنى داۋاملاشتۇرۇپ قوللانغاندا، ئىرسىيەت ئېغىر كېسەللىكىنىڭ يۈز بېرىشىنى تۆۋەنلەتكىلى ياكى ئالدىنى ئالغىلى بولىدۇ.